أنا المصري
أنا ف شق الصعاب فارس
أنا الحارس
وسايق للوجود نصري
أنا المصري
سواء ان كنت مش عصري أو العصري
فأنا المصري
كريم أصلى
ونابت من جدور ثابتة
أنا الفلتة
وإسمى فى الفضا يسرى
أنا المصري
رويت الإرض من دمى
وراح خالى ومات عمى
ف أكتوبر وف النكسة
ولسانى بموت لسة
على ضهرى بنيت جسرى
أنا المصرى
أنا الحاوى أنا مخاوى
بخور مع حنة والجاوى
بشبة فاسوخة نتبخر
ونتحسر على الحالة
ماهيش فارقة
أعيش عالة
ألبس للعيال بالة
أشيل على راسى وأتحمل
لحد ما ينحنى ضهرى
ما انا المصرى
أستف همى تحتيا
وأعمل خوفى شمسية
تضلل ع اللى فاضلى
فتفضل دمعة تفضحني
فتأسرني وتملكني
تفك الشفرة من كارتي
أبات حصري
ما أنا المصري
وإيه يعنى
رغيف العيش
مخاصمنى
وميهمش
لو إن العيد ف مرة ماجاش
وإيه يعنى بلم القوت
من إكوام الـ .......... بلاش
بلاش منه
ومين همه
أعيش وللا
يطول الهم يخرسنى
ما أنا المصرى
سكوتى خلاص بقى طابع
وجوايا كلام واجع
يا سامع قولى لو سامع
بتسمع إيه
ف اناتى وعباراتى اللى دابت دوب
ما أنا المكلوب
وحطانى ف سكتها الحياة بالعرض
بصلى الفرض بالمقلوب
وليه القبلة مش واضحة
وليه مغلوب على أمرى
ما أنا المصرى
سمعتى يا مصر
وللا عاملة مش سامعة
أناابن….
اللى أصبح سىء السمعة
يا ريتك تحضنى ولادك
تلميهم .. تعامليهم
كما لو كانوا م المحاسيب
ويا رب المحاولة تصيب
وما تخبشى
بدل ما أمشى
وأسيبك تخبطى دماغك
في طوب الأرض
تعالى أوام أنا وانتى
نلم العرض
ونرجع قوة من تانى
نسود الأرض
وأعمرلك .. واشيدلك
كمان قصري
ما أنا الفلتة
وإسمى فى الفضا يسرى
ما أنا المصري
أنا المصري
إرسال تعليق