إتجمِّدت فيكي المشاعر ...
قـَوِّتك
وبقيتي أقوى من الحجر
وبقيتي أبرد م الجليد
عمرك ما قـُلتي عليا شاعر
ضحكتك ..
كانت بتسبق كلمتك
سخرية بيا وباللي بيا
لإني طالب صحبتك
ومحبتك...
محقونة في قلب الوريد
سلمت لِك وحلفت لِك
إنتي الوحيدة آمنت لِك
رخَّصت تـمنى احتجت لِك
وعاهدت روحي : هـ امتلك
إحساسي فيا
هـ يقتلك
وهأمره ...
يرجع وليد
مش هـ ابقى كورة تمرريها لملعبك
على مطلبك
مهما اترشق سهم الهوى
أنا قلبي يقدر يخلعك
من مطرحك
ويرحلك
ما أسهلك ..
مش هـ تِبقِي عندي أغلى من غروري
واحتفاظي بكبريائي
مش هـ اعوز منك دوا
لو كنتي دائي
ما انتي كنتي منهجي في أولى ابتدائي
يعنى حافـْظِك
يعنى فاهمِك
يعنى عارف مسلكِك
يعنى بيعك من هنا لعمري اللي باقي
يعني إنتي هاتخسري فْ أول سباقي
يعنى إنتي هاتنتهي
وانا لسة باقي
يعنى خلاص راح توصلك ...
ورقة فراقى .
إرسال تعليق