(( مفتتح ))
..
محتاج قصيده تردّني لله
(( شاعر ))
إذا ضاق البراح .. يرتاح
يخبط على باب القصيده يتفتح باب الرضا
يثبت فؤاده ع الهدى
لو ضلّ فِكرُه وشدّته الأبعاد
محتاج قصيدة رمز
تتوضّى بأدب
وتأوّل الشارد من الرؤية بدون إلحاد
تكسب ثواب الصبر لو زاد الوجع
وتنول شفاعة جرحها
لو ذمّها النقّاد
..
(( ابـــــــــن نــــــــــوح ))
..
فاضل قصيده ونفترِق ..
أنا وانتِ والحلم القماش
ونغنّي للموت عُمرنا
ونبيع هوانا لبعضنا في السوق " بلاش "
ونعزّي في الروح الفرَاش اللي احتفل
- بالوهم -
والعمر اللي متساقط ورق
لحظة خريف الأمنيات المزهره
من قلب .. شاش
..
فاصِل .. هغنّي للأمل
قومي ارقصي ..
واتحزّمي بحزن القصيده ف ضحكتك
الناي ..
هيخلع بحّته ويلبس لموتِك أغنية
ملهاش ف لحن الروح أمل
ولا ليها ف حضورك مقام الّا الغياب
سيبي الوتر ..
يشرب تفاصيل البراءه اللي اتمحت
وقت انتكاسة حلمنا
على نُصّ عُمر ما عشناهوش
أو قلب .. كافر باللقا
رحلة حياتُه ف دمعِتِك كات يوم حساب
على أبّ .. يمكن من ورَق
أو أم لحظة ما انتحر - م الشوق- ضناها
- ف دمّها -
حسّ الأمومه ف نبضها
كات انتداب
على بنت ..
لحظة ما السؤال اللي ف عنيها
- صرختُه -
هدِّت سكون الحزن ف عيون الجواب
على واد شرب كاس الكهوله
- ومفترض -
كان قلبه هيسمَّع طفولته ويبتدي
يتهجّى عمره ف أبجديّات الشباب
..
فاصِل .. هواصل رحلتي
لحظة ما اخاوي الموت ف دمعي اللي ابتسم
لسفينه حالفه تشقّ بالنور دربها ف بحر الضباب
لسفنيه .. مش من إيد نبي
ولا ليها قصّه اتسطَّرِت جوّه الكتاب
..
جرحين عذارى ..
الشِّعر .. وكتاب الطموح
وانا وانتي مش بِكر المواجع والأسى
جسمين بقلب وعُمرهم كان دمع روح
محتاج اصيغ النَّص ف عيونِك " نبي "
واخلعني والبس " إبن نوح "
واطلع على جبل السراب
يا اغرق .. يا إمّا نلتقي
..
إرسال تعليق