من حبك انتي بدأت حكايتى
مع التاريخ و لم تزل
يا بلدنا و انتي كنتي رافعه
راسنا دايماً م الأزل
دلوقت ليه بتمدى إيدك
متخضبه بدم القريب
و بتفتحى بابك لخاين
و بتقفليه ف وش الحبيب
و تحلى شعرك للغريب
و السفيه ... و المبتذل
من إمتى كان عرضك مشاع
من إمتى كان حبك ضنين
من إمتى حبيتى الخداع
يا ام العيون الدبلانين
من إمتي سعرك بالدولار
و الين ... و اليورو المتين
من إمتى حرمتى التراب
على الغلابه المطحونين
من إمتى عليتى المزاد
و لا المزاد رايح لمين
الكل طال .... الكل خاد
إلا اللى شالك ع الجبين
إلا اللى حبك و اشتراكى
إلا الأيدين العرقانين
إلا اللى طالع من حشاكى
و أصله من نفس العجين
مابقتش قادر ع الغرق
أنا أصلى فارس من ورق
سبتك بتنهى و تأمرى
ياللى ف قلبى بتحفرى
حلى ضفايرك و اسهرى
أنا أصلى مش حارس أمين
إرسال تعليق